fbpx

《食全餐》

Category : 懷孕中

其實喺古代,生仔並不是一件容易的事,處理唔到會死兩條人命,佢哋以順產為主,嬰兒必須經過孕婦嘅陰道,如果有性傳播疾病會影響嬰兒,有機會影響BB終身,所以女兒身必須係大家閨秀,先可以減低風險,所以話女兒身體要乾淨,揀錯3個一齊病。當然,冇菌都有機會一屍兩命,或者強行剖腹產子犧牲母親,哎呀,真係幾殘忍都有。所以母子平安你話幾重要呢。

2021年,最殘忍就係食全餐㗎啦,先嘗試順產20小時,痛足20小時,宣布失敗,然後打麻醉針開刀剖腹產子⋯⋯

我哋有位同事有試過順產,有試過開刀,有試過生孖胎,又試過生仔,又試過生女,重點係你估佢有幾多次嘅懷孕經驗呢?留言睇睇👀

好多時候香港人都係貪心嘅,一次生產經驗裏面可以即刻試到兩種唔同嘅方法,感受晒古代人到現代人喺生產上面所感受到嘅嘢,咁講就真係好抵。不過呢個便宜就吾好貪,避免痛楚,都係做定順產準備*

選擇順產,作為媽媽嘅你先要肯定自己係大家閨秀,比一個全天然嘅生產過程比自己嘅小朋友出生,係一件值得尊敬嘅事。

至於放棄,分娩屬於第七級痛,第八級痛已經係一級燒傷,所以盡咗力就OK啦。

如果就嚟生嘅媽媽睇到呢篇文,無論你嘅選擇係點,以今日嘅科技都一定可以確保你地母子平安。最多食全餐,放心!💪🏼


《慣性流產:邊個嘅錯?》

Category : 懷孕前

慣性流產指懷孕12週內,連續兩次以上嘅自然流產。根據衛生署家庭健康服務嘅統計,本港每100名女性,就有一名出現慣性流產。當中嘅原因相當複雜,亦唔一定只係同媽媽有關。

1. 染色體異常

如果兩夫妻其中一方嘅基因出現染色體平衡移位,當中嘅生殖細胞就有四分之一機會導致流產或畸胎。避免此類型流產,建議夫婦計劃生育前,安排基因檢測包括:

– 核型分析測試/染色體核形分析檢測

– 晶片式全基因體定量分析/產前基因睇晶片( C M A )檢測

2. 子宮畸形、異常

先天性雙子宮、中隔子宮或者是後天性子宮頸無力、子宮內膜黏連、子宮肌瘤等都有機會影響受精卵著床。建議女性計劃生育前,安排陰道超聲波檢查,排除可能引致流產嘅風險。

3. 凝血異常

身體嘅保護機制會令孕婦血液較易凝固,避免生產時大量出血。但如果女性本身就凝血異常,變相容易懷孕期間血液循環變差,令胎兒無辦法吸收營養,導致流產或死胎。

4. 內分泌異常

內分泌問題如黃體素不足、肥胖、甲狀腺功能長期處於低水平等,都係造成流產嘅常見因素。如果你有以上問題就最好搵醫生傾傾。

5. 孕婦年齡

卵子質素會隨住年齡退化,小產嘅機會亦會隨之而上升,由30歲嘅兩成急升到42歲嘅五成。孕婦本身嘅長期病患如糖尿、血壓高等亦會增加小產風險。


相關文章:

代孕知多D


《代孕知多D》

Category : 懷孕前

近期國內有女星因代孕棄養,多年事業被一鋪清袋,呢單新聞一出,我身邊唔少朋友都對代孕好感興趣,係咁問我相關嘅野,索性一次過將睇嚟複雜嘅事,簡單化咁講解下,唔駛我講完又講嘛!

代孕(Surrogacy)最早係《聖經·創世紀》出現,係輔助生育嘅一種方式,直白D講就係借人家嘅子宮孕育及生BB? 至於點解要咁做,理由千千萬萬,用個生活化D嘅比喻,你想整麪包,自家焗爐壞左,又或者你唔想整污漕自己個爐,唔想事後清理,甚或你家根本無焗爐(男同),以至你純貪方便,唔想自己承受孕期中嘅不適及風險……咁最好嘅方案,咪就係代孕囉!

代孕都有好幾種方式,滿足唔同人嘅需要,簡單可以劃分為以下四種:

  1. 精子和卵子係兩公婆嘅,淨係借用代孕媽媽嘅子宮,坊間叫呢種方式做「全程代孕」。

  2. 精子由丈夫提供,卵子就由代孕者提供,經體外授精後,由代孕者懷孕生育,一般都係因為太太卵子質量唔夠靚,又或者男方純粹只係想要子嗣。

  3. 精子由第三方提供,卵子由代孕媽媽提供,經人工授精後,由代孕者懷孕生育,兩公婆都有不育問題嘅話,好多時會採用呢種方式。

  4. 女方提供卵子,經優質人工授精後通過胚胎移植由代孕者生育,同第2種方式相若,只不過主導者係女方。

雖則話代孕越嚟越普遍,但係全球仲未有統一規條監管,成個代孕以至生產嘅過程中,變數多不勝數,所以如果想生B,除非自己真係無能為力,否則事前Check清楚自己嘅身體狀況,可修嘅修可補嘅補,生B用返自己個爐,親身感受孕期中母子連心嘅悸動,先至係上算之策。

改善自己身體嘅質素,可以從飲食開始,可以參考吓以下文章


  1. 孕期Coffee Tea or B

  2. 一文睇清懷孕前、中、後期要補充咩營養(前期)

  3. 一文睇清懷孕前、中、後期要補充咩營養(中期)

  4. 一文睇清懷孕前、中、後期要補充咩營養(後期)

  5. 懷孕營養懶人包 素食者都啱睇

  6. 大肚婆食幾多先夠

  7. 懷孕要夠”薑”

  8. 懷孕重口味


《懷孕重口味》

Category : 懷孕中

大肚時嘅口味真係好難搞,平日鍾意食嘅突然好憎,唔食嘅又會忽然好想食。好似我陀仔前,食得都算清淡,但一有左,就變得重口味,成日心思思想食薑蔥蒜,想食又唔敢食,但我個產科醫生嘅一句說話:大肚婆都係人,適可而止,係食得嘅……,聽到之後即刻YEAH一聲,然後Search下應該點食,既可以令自己開心D,又唔會影響到個B。

唔講唔知,蔥含有大量葉酸(有助胚胎神經管道發育)、鎂(Magnesium)(避免孕期便秘)、鐵(有助胎兒腦部發育,預防孕婦患上缺鐵性貧血和減少產後貧血),最重要蔥係天然無糖食材,有妊娠糖尿嘅孕婦食咗,可以補充維他命,但係就唔會影響血糖。至於大蒜仲勁,有維他命B1、B2、鈣、碳水化合物、鐵、磷、鉀、蛋白質、鈉及維他命C,仲有蒜素(Allicin),可以增強免疫力。

陀B身子比較弱,最怕乍暖還寒,唔小心就好易攝親作病,JM們可以試下煲呢個蔥蒜粥,有助預防打好個底

蔥蒜粥

10根白蔥切碎,3瓣大蒜去衣,連同50克大米洗凈,加水煮粥,趁熱食。

蔥蒜好處多多,但點都係辛辣刺激嘅食物,大肚婆唔好生食,空肚、食太多或者長期食蔥蒜,否則好易傷及腸胃影響到個B,要食就最好煮熟嚟食,即係蒸魚加係面頭,炒菜時爆香蔥蒜一齊炒,重中之中都係個句,適可而止,滿足左口腹心癮,開開心心心享受陀B嘅樂趣。

P.S. 薑既資訊參照(懷孕要夠薑)

懷孕要夠薑


相關文章:

  1. 孕期Coffee Tea or B

  2. 一文睇清懷孕前、中、後期要補充咩營養(前期)

  3. 一文睇清懷孕前、中、後期要補充咩營養(中期)

  4. 一文睇清懷孕前、中、後期要補充咩營養(後期)

  5. 懷孕營養懶人包 素食者都啱睇

  6. 大肚婆食幾多先夠


《懷孕要夠“薑”》

Category : 產後

做人要夠薑,大肚陀B更加要夠薑! 薑有驅寒、止嘔、預防感冒、止痛、止瀉、健胃嘅功效。佢仲含有多種礦物質,好似鈣﹑鐵﹑磷及維他命A﹑B﹑C﹑胡蘿蔔素咁,唔講唔知,喺懷孕早中晚以至生完B,每個時期都用得著佢。

懷孕頭三個月,體內荷爾蒙分泌增加,會分泌大量黃體素嚟穩定子宮,主要係減少子宮嘅平滑肌收縮,等阿B有個更穩定嘅地方成長,但咁樣同時會影響到腸胃嘅平滑肌蠕動,會好易令到大肚婆噁心、反胃、嘔胃水或者嘔到停唔到,有人嚴重到離唔開個馬桶,你都咪話唔得人驚。薑入面嘅薑醇(Gingerols) 及薑烯酚(Shogaols)對於早期孕吐,係有舒緩嘅功效。

喺懷孕五個月開始,BB喺肚入面會大得好快,孕婦每週體重會增加1至2磅,血液循環會因為體重增加而變得無咁順暢,好常會出現水腫、抽筋嘅情況。呢個時期,孕婦可以用薑粉沖水浸腳,消除水腫,同埋減少下肢唔舒服嘅情況。

到坐月期間,傳統上惡露清晒後會食豬腳薑,薑飯,有助祛風去瘀﹑沖涼又會用薑水,減少日後患上風濕及關節痛等毛病嘅風險;仲有幫助產後恢復好面色,含有薑成份嘅Mask,內服外用,你話懷孕點可以唔夠薑呀!

薑係好東西,但要注意以下幾點:
● 孕婦吃薑要適量。
● 如果熱氣生瘡,就要暫時禁食。
● 宜加入湯或餸菜同食,唔好單獨食。
● 最好係朝早飲薑水,有助暖身,提神。
● 爛左嘅薑唔好食,會產生黃樟素,對肝細胞造成損害。
● 加工或醃製過嘅薑,最好都少食或者唔食。
● 天然薑汁宜用溫水沖飲,糖份可免則免。


相關文章:

  1. 孕期Coffee Tea or B

  2. 一文睇清懷孕前、中、後期要補充咩營養(前期)

  3. 一文睇清懷孕前、中、後期要補充咩營養(中期)

  4. 一文睇清懷孕前、中、後期要補充咩營養(後期)

  5. 懷孕營養懶人包 素食者都啱睇

  6. 大肚婆食幾多先夠


《大肚婆食幾多先夠》

Category : 懷孕前

養胎唔養肉,肥肚不肥身,相信係每個大肚媽咪嘅目標。想攝取到足夠營養,又唔會過份增磅,就首先要摒棄「EAT FOR TWO」 呢個想法! 食太多,最後只會肥落媽咪身上。與其諗住因為體內多咗個B,而要增加食量,不如精挑細選你進食嘅質量,為BB提供所需營養。

媽媽同胎兒分別喺懷孕過程中嘅不同階段,會需要攝取不同營養。一般嚟講,媽咪嘅營養吸收主要針對避免孕期不適,例如抽筋,脫髮,骨質疏鬆,同產後記憶力下降等問題;而胎兒所需嘅營養,例如:維生素B12、葉酸、鈣、鐵、DHA 等,就主要幫助神經系統發展,降低神經管畸形,兔唇等等嘅機率。

醫生建議健康BMI嘅女士,喺懷孕期間總體重增加25至35磅就可以。這些增加嘅磅數包括嬰兒、胎盤、羊水、乳房組織等等。BB體重喺頭三個月一般只有20-30g,所以如果媽媽喺呢個時候已經增磅,就好大可能肥落自己身上!到懷孕中期同後期,就建議媽咪可以每日增加300卡嘅卡路里。整個孕期而言,1-3月建議整體增加1至4磅,4-9個月每月加2至4磅,體重集中係懷孕最後三個月先明顯增加就最理想。

唔節制咁增加食量,除咗令媽咪體重上升,變相產後修身更困難,增加患上高血壓同妊娠糖尿嘅風險之外,巨嬰亦會增加生產嘅風險,及有更高機會需要剖腹,所以各位媽咪記得控制食量呀。


相關文章:

  1. 孕期Coffee Tea or B

  2. 一文睇清懷孕前、中、後期要補充咩營養(前期)

  3. 一文睇清懷孕前、中、後期要補充咩營養(中期)

  4. 一文睇清懷孕前、中、後期要補充咩營養(後期)


《懷孕營養懶人包 素食者都啱睇》

Category : 懷孕中

為咗提供足夠嘅營養,等BB嘅腦部同身體可以正常發育, 懷孕媽咪需要特別注意飲食。即刻睇吓以下嘅懷孕營養懶人包(素食者都啱睇!), 參考有咩食物可以為你提供懷孕所需營養啦:

( 如果想詳細了解每種營養對胎兒發展嘅效益, 同每個懷孕階段特別需要嘅營養, 請參考以下連結:

一文睇清懷孕前、中、後期要補充咩營養(前期)

一文睇清懷孕前、中、後期要補充咩營養 (中期)

一文睇清懷孕前、中、後期要補充咩營養 (後期)

葉酸

含豐富葉酸嘅食物包括肝臟,若果媽咪係素食者, 就可以多食深綠色葉菜如菜心、乾豆、豆類如青豆、花生、果仁、水果,如皺皮瓜、橙,某些早餐穀物亦添加了葉酸。

含豐富鐵質嘅食物包括肉類如豬、牛、雞、魚肉;素食媽咪就可以多食深綠色蔬菜如西蘭花、芥蘭、菠菜、乾豆及果仁類如扁豆、紅腰豆、鷄心豆、杏仁、腰果。某些早餐穀物麥片亦添加咗鐵質, 不過就要注意糖分。

含豐富鈣質嘅食物包括牛奶同奶製品,蝦米、魚乾同沙甸魚;素食媽咪就可以選擇加鈣豆奶、板豆腐深綠色蔬菜、芝麻及果仁等。

注意: 儲存不當嘅奶類製品, 容易被李斯特菌污染, 建議媽咪選擇經殺菌處理嘅食物。

卵磷脂

含豐富卵磷脂嘅食物包括蛋類、奶類製品;素食媽咪就要多食黃豆製品例如豆漿、豆腐、豆干,小麥胚芽、花生等。

奧米加-3脂肪酸

魚類含豐富奧米加3脂肪酸,如三文魚、沙甸魚、鰻魚、紅衫魚、秋刀魚、䱽魚等;素食媽咪可選亞麻籽、合桃、芥花籽油。


相關文章:孕期Coffee Tea or B


《一文睇清懷孕前、中、後期要補充咩營養(後期)》

Category : 懷孕中

踏入懷孕最後階段, 媽咪嘅體重喺呢個時候變化最大。胎兒正在快速成長,大腦、肌肉、神經、心臟同聽覺等器官都接近發育完成,所以體重亦因此迅速上升,媽咪係短短呢幾個月嘅體重會增加約5公斤。除咗計算BB嘅體重外,羊水以及胎盤嘅重量亦會明顯增加。在準備好同BB見面嘅同時,媽咪亦要繼續注意呢個階段嘅特別營養所需呀。

鈣質同鐵質將會喺呢個時候繼續發揮重要角色。胎兒由媽媽身上吸取大量鐵質貯存喺體內,以應付出生後頭4個月嘅發展所需。

另外,卵磷脂嘅攝取係呢個階段亦十分重要。卵磷脂係提供全身細胞膜建構嘅一個重要成分,維持細胞膜結構完整,令營養或廢物能夠順利進出。卵磷脂有助修復細胞膜,可以幫助媽媽嘅子宮喺產後收縮,減低大量出血嘅機會。佢亦係減少餵飼人奶時出現塞奶,同提升母乳中蛋白質吸收嘅重要元素,有助增強BB免疫力。一般建議孕婦可以由孕期後期開始,每日服用若 1200mg 。而由於卵磷脂屬脂溶性,如果藉住食物嘅油質幫助吸收效果會更好,所以飯前或飯後30分鐘內進食就最好。如果想選擇從食物中攝取卵磷脂嘅話,就可以多食黃豆製品例如豆漿、豆腐、豆干等,蛋類、鮮奶、小麥胚芽、花生等都含有豐富嘅卵磷脂。

營養在內,按摩在外,想母嬰健康內外兼備,可以試下我地嘅孕婦按摩,了解詳情:https://www.beautymama.com.hk/latest-offer/


相關文章:一文睇清懷孕前、中、後期要補充咩營養(前期)

相關文章 : 一文睇清懷孕前、中、後期要補充咩營養 (中期)

相關文章:孕期Coffee Tea or B


《一文睇清懷孕前、中、後期要補充咩營養(中期)》

Category : 懷孕中

踏入懷孕中期(17~29週),胎兒嘅器官包括消化系統、泌尿系統、神經系統、生殖器官等已經大致成型。 除咗要繼續補充葉酸外,亦要注重鈣質,鐵質同不飽和脂肪酸好似DHA +EPA等嘅吸收。

 

鈣質

鈣質對胎兒同媽媽同樣重要, 建議每日吸收1000毫克:佢有助BB骨骼同牙齒發展,而由於胎兒完全透過媽咪吸收所需鈣,媽咪亦要確保自己有足夠鈣質。鈣質不足會令新陳代謝失常,容易腳抽筋,有機會導致骨質疏鬆。

 

鈣質需要透過維他命D轉化,先可以被身體吸收。所以除咗攝取適量嘅鈣,亦要注意補充適量維他命D,每日建議量為2,000IU左右。

 

鐵質

鐵質係造血同輸氧嘅重要營養元素,能夠促進嬰幼兒腦部發育,保護腦神經系統功能。懷孕期間,媽咪身體對血量嘅需求增加,若果血紅素嘅增加跟唔上,就會出現生理性貧血,影響胎兒含氧量同成長。

 

吸收足夠嘅身鋅可以減少媽咪流產、早產、疲勞、嘔吐等情況;亦避免BB大腦或器官發育功能不全

 

不飽和脂肪酸 DHA +EPA

DHA同EPA係維持神經系統同構成大腦同視網膜嘅重要元素。同鈣質一樣,呢兩種不飽和脂肪酸需從飲食中吸收。魚類有豐富嘅不飽和脂肪酸, 不過懷孕媽咪亦要注意, 避免進食大型魚類, 因為佢哋可能含有大量的汞,會損害胎兒嘅大腦和神經系統。

營養在內,按摩在外,想母嬰健康內外兼備,可以試下我地嘅孕婦按摩,了解詳情:https://www.beautymama.com.hk/latest-offer/


相關文章:

  1. 一文睇清懷孕前、中、後期要補充咩營養(前期)

  2. 孕期Coffee Tea or B

 

 


《一文睇清懷孕前、中、後期要補充咩營養(前期)》

Category : 懷孕中

大肚媽咪要吸取適當嘅營養,最重要就係要了解整個孕期嘅不同食物需要,然後針對前、中、後期攝取所需嘅營養,而唔係盲目咁增大食量。

大肚媽媽喺懷孕過程中嘅營養吸收,可以避免孕期不適,例如抽筋,脫髮,骨質疏鬆,同產後記憶力下降等問題。

懷孕初期(即前三個月)係BB神經系統發育嘅重要時刻,而葉酸有助BB神經系統發展、減少胎兒有兔唇等先天性畸形嘅機率,更可以減少懷孕初期出血同流產嘅機會。 另外,葉酸對於懷孕媽咪嚟講亦非常重要,佢負責製造紅血球,所以缺乏葉酸有可能引至貧血以及令白血球減少,導致身體無力、 情緒容易波動,及無胃口等副作用。

不過,由於葉酸喺水溶性嘅維生素,所以無法被身體儲存,需要透過食物或進食補充品吸收所需嘅份量。根據世界衛生組織所定嘅標準,準備懷孕前三個月同懷孕初期每日吸收0.4毫克葉酸就足夠架啦,唔適宜過量攝取,因為過量嘅葉酸只會隨著尿液排出體外,大劑量服用葉酸更可能出現小便太黃嘅現象。

仲有一點懷孕媽咪需要注意,由於葉酸喺鹼性或中性嘅環境會比較穩定, 更容易被人體吸收;反而酸性環境會破壞葉酸。 所以假若媽咪有服用維他命C補充品嘅習慣,就要注意最好隔半小時以上先好再服用葉酸補充品啦。

營養在內,按摩在外,想母嬰健康內外兼備,可以試下我地嘅孕婦按摩,了解詳情:https://www.beautymama.com.hk/latest-offer/


相關文章:

  1. 一文睇清懷孕前、中、後期要補充咩營養(中期)

  2. 孕期Coffee Tea or B